非牟利機構裝修，唔一定要「將就」——拆解三個常見迷思
- 6月16日
- 讀畢需時 2 分鐘
做咗十年室內設計，經常接觸到非牟利機構（NGO）嘅項目。好多朋友一嚟就話：「我哋budget好緊，是但啦，最緊要平。」但其實，NGO 裝修唔等於要犧牲一切。今次就同你拆解三個好常見嘅迷思，等你可以用有限資源，換到最合理嘅結果。
迷思一：NGO 裝修只能用最平嘅物料？
平價物料一定唔襟用？唔一定。關鍵係要分清楚「邊度可以慳，邊度唔慳得」。例如地磚揀防滑啞面款，唔一定要用意大利進口，本地品牌已經夠做；但係防水工程、電線呢類隱藏工序，慳落去隨時要你半年後翻手。我哋通常會同客傾清楚：錢要使喺結構安全同功能性，面飾就可以靈活取捨。
迷思二：NGO 空間唔需要設計，實用就得？
呢個係最大嘅誤解。實用當然重要，但設計唔係奢侈，而係幫你解決實際問題。例如枱凳點樣排先可以避免互相干擾？冷氣出風位點樣唔吹正同事後腦？牆身顏色點樣令到間房感覺大啲？呢啲都係設計嘅 part，唔係「靚唔靚」嘅問題，而係「用得舒唔舒服」。一個好嘅 layout 可以提升工作效率，減少能源浪費。
迷思三：NGO 項目工程管理可以求其，反正有人 pay？
呢句最危險。無論係用公帑定捐款，每一蚊都要用得其所。好多人以為搵個街邊判頭就搞掂，但最後甩漏多到要額外補錢。我哋建議至少要有清楚嘅報價單、施工時間表，同埋每星期一次嘅匯報。你唔需要係工程專家，但係透明度同記錄一定要有，咁先保障到機構嘅利益。
如果你正面對類似的設計兩難，歡迎與我們聊聊你的想法。我哋唔會硬銷套餐，純粹傾吓點樣用最合理嘅資源達到最好效果。
留言