揀室內設計公司，大就一定好？拆解三個常見迷思
- 6月1日
- 讀畢需時 2 分鐘
裝修同設計，對香港人嚟講永遠係又愛又恨。你上網一search「室內設計公司」，彈出嚟嘅結果五花八門：有集團式上市公司，又有樓上私人工作室。好多客人都問我：「大公司係咪穩陣啲？細公司會唔會容易走佬？」今日我就用一個行內人嘅客觀角度，拆解三個最常見嘅迷思，唔推銷，純分享。
迷思一：大公司設計經驗更全面？
集團式室內設計公司通常有龐大團隊，由設計師、項目經理到跟單妹一條龍。理論上分工細緻，但實際運作時，你接觸嘅可能只係入職兩年嘅junior，真正落場嘅經驗未必夠。反觀一啲只有幾個人嘅設計工作室，老闆親自畫圖、度尺、監工，反而更熟工程細節。我見過有位師父出身嘅設計師，對喉管大細同結構負荷嘅判斷，比大學畢業嘅設計師更精準。
迷思二：貴價公司用料先可靠？
好多時報價貴，未必係因為用靚料，而係營運成本高（租金、廣告、管理層）。我見過用$8,000/尺嘅設計公司，櫃門用最普通嘅夾板貼膠板；反而一間$3,000/尺嘅小型公司，用德國進口鉸鏈同實木皮。物料價錢同公司規模無直接關係，重點係設計師夠唔夠老實，肯唔肯同你逐項解釋選材原因。
迷思三：細公司好難夾時間？
因為細公司人手少，入伙期會唔會成日延誤？事實上，延遲最常見嘅原因係圖則同現場情況有出入，而唔係公司人數。大公司項目多，分分鐘一個PM跟十幾單，回覆慢到你想殺人。細公司因為得幾個項目，反而可以更快調配師傅。我哋經驗係：只要前期度尺夠準，同客人溝通夠清楚，九成以上工程可以準時交場。
最後想講，無論你揀邊類型嘅室內設計公司，最重要係見面時問清楚三件事：佢親身落過幾多場？有冇處理過同類間隔嘅經驗？同供應商關係如何？如果你正面對呢類選擇困難，又或者想分享你嘅經驗，歡迎同我哋傾吓，交流下真實嘅諗法。
留言