住了3年後的浴室，會變成什麼樣？——那些「剛完工」照片不會告訴你的事

已更新：6月27日

上星期返去一個三年前我哋負責嘅單位做售後跟進，業主一開門就話：「間屋冇問題，但浴室個櫃底有少少脹。」老實講，聽到呢句我反而放心—因為佢講嘅係真係會發生嘅事，唔係客氣說話。今日想同大家分享，跳過「剛完工」filter之後，香港浴室喺3-5年後嘅真實樣貌，同埋點樣可以避免十年後先後悔。

防水層：最易忽略嘅「隱形壽命」

好多業主以為做好防水就一勞永逸，但實際上香港浴室長期潮濕，加上樓宇沉降微細移位，防水層嘅壽命大概係8-10年。重點唔係「用唔用得」，而係「幾時開始老化」。

浴室櫃板材係最大伏位。好多號稱「防潮板」嘅物料，其實只係面層做咗處理，一但邊位爆開或者水氣滲入，半年內就會發脹變形。我哋一向建議用不鏽鋼架配人造石枱面，或者揀真正嘅防水夾板（如WBP等級），雖然預算高啲，但五年後你唔會後悔。

五金方面，門鉸同抽屜滑軌最易出事。香港浴室空氣中水氣重，廉價電鍍鉸鏈大概三年就會生鏽，開關會「卡卡」聲。建議一係揀不鏽鋼（304級別），一係做足定期清潔—用乾布抹吓，唔好等生鏽先處理。

仲有一個好多人忽略嘅位：填縫劑。普通白水泥填縫劑，一年後開始發黃、發霉，掃極都唔乾淨。而家用環氧樹脂填縫劑（Epoxy Grout）雖然貴約一半，但防霉同耐污能力好好多—尤其係淋浴區地面，三年後仍然係白色，唔會灰黑一撻。

如果預算有限，至少要喺淋浴區用環氧填縫，其他位置用水泥填縫都仲可以接受。

講咗咁多，唔係想嚇你，而係希望喺決定之前，你睇到嘅唔止係「完工照」入面嘅靚，而係知道每樣物料大約用到幾耐，幫你喺預算同長遠之間做個平衡。如果你對浴室裝修有咩考慮，或者想知某個物料用五年後會點，歡迎同我哋傾傾—我哋樂意分享真實用家經驗。